Turmush — Кант шаарындагы «Үмүт» балдардын патранаттык-адаптациялык борборунда тарбиячылар жана ата-энелер менен биргеликте даярдалган «Салам айт, санжыралуу Ноорузум!» аттуу салтанаттуу иш-чара өттү. Бул тууралуу Ысык-Ата райондук мамлекеттик администрациясынан билдиришти.
Иш-чарага Ысык-Ата райондук мамлекеттик администрациясынын башчысы—акимдин орун басары Нурбек Сагынбаев, Кант шаарынын мэри Улан Майлибашев, райондук билим берүү бөлүмүнүн башчысы Чынара Бакашева, билим жана илим кызматкерлеринин райондук профсоюздук комитетинин төрайымы Бактыгүл Тыныбекова жана райондогу бала бакчалардын башчылары катышты.
Борбордун тарбиячылары өз тайпаларындагы бөбөктөр менен бирге сүмөлөктүн тарыхын, наристени бешикке салуу салтын, шырдактын даярдалышын сахналаштырып көрсөтүп, өнөрлөрүн тартуулашты.
Ысык-Ата району көп улуттуу аймак болгондуктан, орус, түрк, өзбек, дунган, азербайжан, молдован улуттарынын салт-санаалары, улуттук тамак-аштарыда тааныштырылды.
Иш-чара №32 бала бакчасы тарабынан уюштурулду.
